Судебник короля Казимира Яґайловича, даний Литві (1468, лютого 29) (Витяги)

Казимиръ, Божьею милостью король Полскый, великый князь Литовьскый и Рускій, княжа Пруское, и Жомоитьскый и иныхъ, чинимъ знаменито симъ нашимъ листомъ, кто на нь посмотрить, или чтучи услышить, ижь мы съ князьми и съ паны радою нашею великого князьства Литовьскаго и съ всимъ поспольствомъ сога- давши, урядили есмо такъ:

Што съ лицомъ приведуть татя, будеть ли мочи чимъ плати­ти, ино заплатити истину; пакъ ли чего у дому не будеть, а будеть ли то жона ведала зъ детми ужо изрослыми, ино жоною и детми заплатити, а самого на шибениц; а што будуть малый дети, ниже семи годовъ, тыи въ томъ невинни.

А въ кого будеть украдено, а што судьи присудять: ино прво заплатити истьцю, а потомъ осподарь татя того вину свою бери.

А коли выдадуть жону, а любо дети татиныи, а у колце судьи скажють, а потомъ возмогутъ ли ся выкупити, а любо осподарь ихъ усхочетъ выкупити: и они могуть ся выкупити. А будетъ ли въ дому статковъ татя того, и онъ домовыми статкы плати: оли жъ бы не было чимъ платити изъ дому, ино жоною и детми платити, какъ у верху писано.

А коли бы злодей што у кого укралъ, а и где украдено, а тамъ его ухватятъ съ лицомъ, а онъ у домъ не принеслъ, жона и дети того не поживали: злодей терпи, а жона и дети и домъ ихъ невиненъ.

А коли злодей изъ дому вышелъ, а украдеть што и потеряеть, а любо што изьесть, а кроме жоны и детей: ино домовыми статкы, што того татя влостное, заплатити, а жона и дети, и статкы женьни отъ того порожни.

А коли чій человекъ у злодейство упадеть, а будеть осподарь его тое ведалъ, а любо и съ нимъ уделъ имелъ, а будеть на то до- водъ: и тотъ такъ терьпи, какъ который злодей.

А который будеть лежъни держати у своемъ дому тайно, а сусе- демъ околици не оповедаеть, а въ томъ часу што у кого изгынеть, а бу­деть на то доводъ, ижь лежьни дрьжалъ: ино дати тому рокъ^[21], и дру­гій, и третій, ижь бы того лежьня поставиль, ли съ себе извелъ; а пакъ ли на рокъ на последній не поставить, заплати жъ, а того ищи; а на- шодъ къ праву поставити: не дей исправляется, а то уже заплачено.

А коли бы нашъ человекъ вину далъ князьскому или паньскому, или боярьскому человеку, а въ которомъ повете, подъ нашимъ на- местничьствомъ или тивуньствомъ: ино нашему наместнику, а любо тивуну, обослати, ижьбы нашому человеку стало ся право; а пакъ ли усхочеть на обчій судъ, ино ихъ на обчій судъ пустить и рокъ дати.

А будуть ли на нашомъ человеце князьскыи или паньскыи, или боярскыи люди чого искати: ино тому судъ и право передъ наши­ми наместьникы и тивуны, который отъ насъ где што дръжить; а нашимъ урядникомъ дати право на обе стороне.

А которому человеку князьскому или паньскому, или б оярьско- му до князьскыхъ и до паньскыхъ или до бояръскыхъ людей дело: ино хто ищеть на комъ, ехати ему искати правомъ предъ оспода- ремъ его; а не уделаеть ли права, ино обчій судъ, рокъ положивъ со обу сторонъ, а тогды уделати и справедливость. Пакъ ли будеть некоторый отводити, ино намъ дати децького^[22]; а не пригодиться насъ въ великомъ князьстве Литовьскомъ, ино воеводамъ нашимъ моцно дати децького.

А коли злодея выдадуть исъ права, а чимъ его възвелять, каз- нити по его деломъ. А кому татя выдадуть, а тотъ не въсхочеть его казнити, а усхочеть на немъ заплату побрати, а его пустити, а любо его собе вь неволю възяти, а на то будеть доводь: тотъ уже исъ пра­ва выступаеть, и намъ и съ паны радою нашою великого князьства Литовьского о томъ погадавъ, какъ его казнити, а и сказнити его, чого будеть достоинъ. А надъ злодеемъ милости не на добе.

А кто украдеть выше полукопья, а любо корову, того узвесити.

А который впервое украдеть, а дотоль будеть не крадывалъ: ино за первую татбу виною его казнити; аже будеть ниже полтины домовыи речи кралъ, домовыми жъ речьми платити; а будеть выше полтины кралъ, хотя бъ пакъ первое укралъ, ино его обесити.

А который хотя первое укралъ, а коньская татба, коня укралъ, а съ лицомъ приведуть: того узвесити.

А коли татя приведуть, а на кого сокъ усочить, а домучатся тат- бы^[23], а будеть перво того крадывалъ и кому плачивалъ, а околица то будеть ведала: и безъ лица обесити.

А пакъ ли сокъ усочить на кого, а лица не будеть, а перво будеть укралъ, и околица будеть перво злодейства на него не ведала, а бу- деть никому не плачивалъ: ино ему платити татбу истьцю и вину; а смертьною раною его не казнити.

А коли тать дасться на муку, а зеліе знаа, а знатникы будуть добрыи на него, сокъ усочить, а будеть первей того крадывалъ, а любо мучиванъ, а и сьведомо то будеть околици: ино того зелей- ника^[24] хотя не домучатся, ино его обесити.

А коли чіи паробькы^[25] украдуть што у кого, а пакъ у семъ листу верху писано, какъ за которую татбу казнити: коли первое укра- деть, ино его не вешати, а заплатити бондою^[26] его; а не будеть бон­ды, ино осподарь его за него заплатить, а паробка сказнити и про­бити; а коли иметь часто красти после того, а выше полукопья, ино паробка узвесити.

А тако жъ кому будеть до кого какое дело, будеть земное дело, ино ездокы побрати; а будуть иныи который дела, ино судьи побра­ти, а искати правомъ; а порубовъ и наездовъ не надобе, никомуже чинити. А который бы сами собою порубы делали, а любо наезды чинили: ино, кому сталася кривда, тотъ и маеть ся намъ жаловати; а пакъ ли не пригодиться насъ у великомъ князьстве Литовьскомъ, и онъ имаеть паномъ раде нашей жаловати; и паномъ воеводамъ нашимъ по того послати и велети предъ собою моцно поставити, а и досмотрети: будеть ли то такъ чинилъ, а всадити его у казнь и держати до нашего щастного пріеханіа: бо тотъ исъ права земь- ского выступилъ^[27] а надъ право сягнулъ, какъ у верху писано. Мы, пакъ, снемься съ паны радою нашою великого князьства Ли- товьского, осмотримъ того, какою казнью того казнити.

А коли бы два мели ся правовать, а возмуть собе ездокы и судьи: ино учинити имъ рокъ, а дати ведомо за чотыри недели, штобы ся оба-два зготовили къ тому року, передъ тыи судьи; судьамъ же и ез- докомъ тамъ выехати на реченое местьцо. А который бы изъ дву тыхъ сутяжаевъ не выехалъ, тотъ безъ суда виноватъ; а который выехалъ, того оправити вь томъ, чого будетъ искати: нижь коли бы пригодилася наша, а любо земьскаа служба, а любо болесть: тымъ того не истратить.

А коли бы кто коня, а любо клячю знашолъ блудящюю, или иныи который речи изнайдеть, ино оповедати околици: не изнай- деть ли ся истець до трехъ дневъ, ино повести на королевскый дворъ, по давному, да переемъ^[28] свой возми; а пакъ ли который што утаить, а въсхочеть собе покорыстовать, а будеть на то доводъ: тотъ такый злодей, какъ который.

А который будеть люди выводити, а любо челядь неволную, а ух- ватять съ лицомъ: того на шибеницю, а изнайдеть ли ся сокъ, ино тому право: какъ у семъ листу верху писано, по тому его судити.

А такожъ, где который мосты мощивали за дядю нашего, за ве­ликого князя Витовта, и за великого князя Жикгимонта, тутъ бы й ныне каждый свои мостьници замостили и заделали, какъ надобе; а штобы не мешкали, сего жь лета уделали. А на чіей делници щъко- да ся станеть, конь ся образить, ногу изломить: тому платити. А пакъ ли который не заделають своихъ делниць сего лета, а исплошаться: тотъ исъ права выступилъ, на томъ намъ вины десять рублевъ.

Про тожъ, какъ у семъ нашомъ листу выписано, по тому бы есте рядили, а исъ того не выступали.

Хрестоматія з історії України литовсько-польської доби / Упоряд. Т. Гошко Львів: Видавництво Українського Католицького Університету 2011. С. 61-62.