Статут військової служби Великого князівства Литовського 1535 року

Артикулы, которыи от кор(ол)я его м(и)л(о)сти пана н(а)ш(о) го м(и)л(о)стивого за росказанєм панов рад великого к(н)(я)зьтва литовского мают быти даны всим уставичне, которыи ж к той воєн- ной вьіправє на тот час поєдут зъ князтва Литовского, абы кождый тоє ведаючи так ся заховал под грозным каранєм, што бы жадин не смел с них выступити, але так держати, яко нижей написано.

[Ст. 1] Напервей, абы послушенство было. Противку их как гет- манови одиноцство межи всими самими, абы на тягненю або на перебываню, на лежаню так ся кождый заховал тым обычаєм, а не инак яко имъ будет от гетмана росказано, або войско не рядноє, не тихоє, не способное, не далекое, чого Боже вховай, от згиненя, а так подлуг того как от короля его м(и)л(о)сти єсть ознаймено, так абы кождый, так богатый, яко худый так ся заховал, а не смъл того переступити под немилостивым каранєм абы, чого пане Боже вховай, про перяд, а не послушенство збыточных на всих упад не пришол.

[Ст. 2] Хто бы ся мел у войску, на котором [колве] местцы або на шиху к(ня)зь або пан и хто колве с подданых н(а)ших мел мовити противку гетмана або бы подбурял приятелей своих на противку гетмана, которым колве обычаєм, тот чест и горло тратит.

[Ст. 3] Который бы колве бунты у войску чинил против гетмана або иным справцам, а то бы на него переведено трема светки, на ч(ес)ти и на горле ма быти каран, або вемъ где бы таковыи речи волно чинити, а казни нс было, тогды черес таковыи бунты перека- за бы ся деяла всим речам, а стережи Боже, абы черес то впад не пришол.

[Ст. 4] Хто бы местца своего не стерег, где будет через гетмана шихован, на ч(ес)ти и на горле ма быти каран.

[Ст. 5] И теж на шиху, где бы кого гетман поставил, на котором колве местцы, тогды кождый мает там на том местцы стат(и), где гетман кажет, а с того местца никоторыми причинами выламати ся не мает, под честю на горле каранем.

[Ст. 6] Жодный гужъ так как который поставят, так тягнути мает, а мЪстцо вказаное держати, а где ся трафит на перебываню абы один гужъ так за другим шол, яко гетман роскажет, который гужъ за которым перебывати мает, а хто бы посмел зменити або змешати, кождый такий мает на горле каран быти.

[Ст. 7] А возы мают кождый йти за своим гужом и вюки так же подлуг своих гужов, а перерывати их нихто не мает, под каранем на горле.

[Ст. 8] Приводцы, а тыи, што гужы ведают, абы от гужов своихъ не отежчали, а перед гужы своими тягнули, а того полни были, абы жадин з гужу непотребне не выежчали, ани пахоликов не розсыла- ли ани до возов, ани инде, а хто бы ся того важит хотел, абы был грозно каран, абы про недбалост и омешкане, а отежчане поручи­ков нерядне тягнене не было.

[Ст. 9] Так на тягненю, як на леженю абы ясаков не чинили под грозным каранем.

[Ст. 10] Кали потреба прийдет, хто бы ся не поткал з росказан- ем гетманским, честь и горло тратит.

[Ст. 11] Коли бы у трубу затрубено з росказаня гетманского, абы кождый приводца на плец, где войско лежит зъ своим гужом бегъ, а там ся становилъ, а хто бы не бег местца своего не смотрел, на горле ма быти каран.

[Ст. 12] Хто бы трывогу вчинил, а у трубу затрубил без гетман­ского росказаня, ма быти на горле каран.

[Ст. 13] А хто бы на сторожу не шол або не ехал, коли ему роска- жут або стягнул ся без росказаня гетманского, абых тых, которыи у порочени от гетмана мели, на горле мает быти кара, а звлаща тыи, которыи будут к тому повиннии кому поруч.

[Ст. 14] Хто бы таковый был с подданых н(а)ших вшели- кого стану так великого и посполитого, когда бы колве гетман н(а)шъ слал на сторожу або на которую послугу н(а)шу военную, там у воисце абы ся не вымовял, а послушенства против ему нико­торого не вчинил подлуг воли гетманское, тот горло тратить.

[Ст. 15] Коли бы хто справу мел перед гетманом, абы к тому жадный ку своем речи приятел болшей не брал ку своей раде и по­мочи одно дву, абы ростырки и розницы, бунты оттул не приходи­ли болших, хто бы черес то переступил, тотъ горло тратит.

[Ст.

[Ст. 17] Хто бы зваду вчинил, рукою мает быти каран, а хто бы рачил, тот на горле ма быти каран.

[Ст. 18] Хто бы, што за войском ездячи продавал, а тот бы, хто моцю кгвалтом брал, на горле ма быти каран.

[Ст. 19] Перед войском и около войска в неприятелской земли абы жадин палити не смел опроч росказаня гетманского под ка- ранем на горле.

[Ст. 20] Чужого и обчого ч(о)л(о)в(е)ка або которого слугу от подданых н(а)ших абы жадин приняти и переховати не смел опроч ведомости гетманское под страченем горла.

[Ст. 21] Для шкод деланя, абы жадин в пицоване слати не смел опроч гетманского росказаня, а приставов, которых гетман будет посылати, але тым обычаем мают слати, коли войско станет, а гет­ман н(а)шъ сторожу отправит, тогды при оной сторожи, што гет­ман пошлет, мают слати в пицоване доложивши ся гетмана, а хто бы слал без ведомости гетманское а без сторожи, тот горло тратит.

[Ст. 22] На тегненю буд(ь) в неприятелскую землю буд(ь) на­зад опят идучи, абы жадин не смелъ войска отехати опроч гетман­ского призволеня под старченем горла и именя одно в шиху аж до конца тягнути аж до роспущеня мает; и так же и хоружий кождый у своем повете не мает ничого затаити ани отпустити аж до рос- пущеня всего войска, а который бы втаил або отпустил, тот горло и имене тратит, а тот пред ся горло тратит, хто б уехал.

[Ст. 23] Коня чужого нихто не мает приймовати ани до себе брати, а естли бы хто принял, тогды не мает болшъ в себе держа­ти, толко четверть годины, скоро его поймавши, мает оповедит гетману, а в себе єго держати не маєт, а єстли бы хто в себе задер­жал, а знайдено бы кого на нем єдучи або ведучи, тот маєт так ка­ран быти яко злодей.

[Ст. 24] Братей теслев, ковалев, колодеєв, кожемиков и всих ремесников, што там поручоны будут ку военной справе, кому ко- л(ве) от нас або от гетмана, тогды тыи врадники н(а)ши, кому по- ручоно будет не маєт ни одного с тыхъ отпускати без ведомости гетманскоє и хотя бы, хто был немоцон с тых ремесников, тогды и того маєт обявити гетману, а естли бы отпустил без воли гетман- скоє, тот горло тратит.

[Ст. 25] Гетман хто бы ся тому противил албо того держати не хотел, а стого ся вымовял, а над тоє выступовал тот, што от короля єго м(и)л(о)сти маестат єсть ознаймено, а уставено, маєт моц от нас, такового кожно(го) на горле карати.

[Ст. 26] А так абы каждый тыи уставы ознайменыи [и] иныи вси, которыи ж бы водле потребы через гетмана были оповеданы а росказаны держал, а над тоє не выступовал под кара(н)ем на гор­ле або водлуг выступу, яко ся хто допустил а заслужит.

[Ст. 27] Хто бы колве у войску або на сторожи буд(ь) кн(я)зь або пан и кождый пору[чи]к языков поймал, тогды кождый з них абы не смел о положени неприятелском пытати под грозным ка- ранєм на горле, а хто бы колве поймал, тогды не пытаючи в него ничого маєт отвести до гетмана, а гетман маєт єго сам на впокои опытати; тым же обычаємъ и беглеца от неприятеля не маєт нихто пытати кром гетмана.

Історія державної служби в Україні : у 5 т. Т. 3: Документи і матеріали. V ст. до н.е. - 1774 р. К.: Ніка-Центр, 2009. С. 161-164.